Ginpakigbahin ni Arleo Jay Zaulda ro anang kalipay kat nasayran nana nga pasado imaw sa Agriculturist Licensure Examination.
Pahayag nana nga mabudlay ro anang mga inagyan eabi eun ag pobre ro pamilya nga anang kinabugtawan.
Pero suno kana nga bukon it rason ruyon para nga indi imaw makatapos it pagtuon, kung siin nga nagtinguha imaw ag sa padayon man nga bulig ag suporta ku anang mga ginikanan hay nagtapos gid imaw it kolehiyo.
Samtang, eubos man ro kasadya nga nabatyagan ni Marvin Viray ag ku anang pamilya kat masayran nga imaw ra hay pasado sa Licensure Examination for Teachers.
Suno kana nga naging mabudlay ro anang ginpangatubang nga hangkat kung siin nga nagpangamuhan ukon nagschool boy ag nagworking student imaw hasta nga makatapos it pagtuon.
Pahayag nana nga imaw ro nagsustinir sa anang mga kinahang-eanon sa pagtuon, samtang maabo man kana ro gaalalay.
Nasayuran nga panganay ag unang professional si Viray sa andang pamilya.
Pareho man nga nagpreparar ro daywa paagi sa pagpangamuyon ag pagreview.
Dugang pa nanda ro pagpasaeamat sa tanan nga nagbulig ag nagsuporta kanda bago maging mga passers.
Pahayag it daywa nga bukon it sab-eag ro kapobrehan para nga indi maabot ro handum basta ro importante sigon hay nagasalig eamang sa Diyos ag mabaskog ro pagsikap ag determinasyon.
Masayuran nga ro daywa hay medyo magmanghod eun ag padayon ro pagbueoligan.
