KALIBO, Aklan — Daywang motorcycle riders ro patay matapos nga matumba sa andang ginasakyan nga motorsiklo sa magkaseparadong insidente.
Patay kat maka-abot sa provincial hospital ro sangka MDRRMO rescuer matapos nga matumba sa anang ginamaneho nga motorsiklo tuga it nagtabok nga ayam sa Brgy. Sigcay, Banga .
Nakilaea ro biktima nga si Rex Zonio, 33, ag residente it Barangay Poblacion, Libacao .
Base sa report, natabu ro insidente samtang nga nagapa-uli ro biktima halin sa banwa it Kalibo, apang ginasugid nga gulpi nga may nagtabok nga ayam rason nga naduea-an it kontrol ro driver .
Ginpahayag nga tumama ro anang ueo sa sementado nga karsada rason it pag-agum it grabeng lastro sa ueo mag-eowas pa nga owa raya it suksok nga helmet.
Sa pihak nga parte, dead on arrival man sa ospital ro sangka motorcycle rider matapos nga madisgrasya sa anang ginasakyan nga motorsiklo sa Osmena Avenue Kalibo.
Nakilaea ro biktimang si Libert Maayon, 26, residente it Brgy. Pudiot , Tangalan .
Nakaangkon it grabeng lastro sa ueo ro biktima matapos nga bumangga sa likod nga portion it tricycle nga ginasugid nga pilang beses nga bumaliskad tuga it impact it pagbangga
Ginasugid nga natabu ro insidente samtang nga nagapa-uli ro biktima halin sa anang trabaho.
