POLICE Report — Naninahan ro daywang katawo matapos tamaan it shrapnel it ginhaboy nga granada it sambilog sa mga suspek sa ginpatigayon nga checkpoint it mga awtoridad sa national highway sa banwa it Kabacan sa Cotabato.
Ginbueong sa ospital ro mga naninahan nga sanday Toto Abdul Sangcupan, 51, barangay tanod, it Brgy. Kibayao, Carmen, Cotabato ag Ahron Jay Mendigoria Tangonan, 18, owa it asawa ag residente it Brgy. Osias, Kabacan, Cotabato.
Ginatugis eon it kapulisan ro mga suspek ag nakilaea ro sambilog sa mga raya nga si Samrod Ulimpain Usman, dating preso it Kabacan police station ag nakahilway matapos mabasura ro anang kaso.
Base sa report it Kabacan Municipal Police Station, bandang alas-10:42 it gabi-i natabu ro insidente sa Barangay Osias it nasambit nga banwa.
Suno sa kapulisan nga nagapatigayon sanda it Comelec checkpoint sa Barangay Kayaga, Kabacan, Cotabato kat nag-agi ro sangka XRM motorcycle ag sa baylo nga magpundo hay nagdere-deretso ro mga raya.
Insigida man nga gin-eagas it tropa it Kabacan-PNP ro mga suspek ag pag-abot sa nasambit nga lugar hay gulping naghaboy sanda it granada sa mga naga-eagas nga pulis.
Tinamaan sanday Sangcupan ag Tangonan sa eawas nga insigidang gindaea sa ospital samtang nakapaeagiw ro mga suspek.
