NUMANCIA, Aklan—Arestado ro daywang pekeng kolektor it sangka financing company kasunod it ginpatigayon nga entrapment operations, hapon it Miyerkules, Oktubre 23 sa sueod it Barangal Hall it Laguinbanua East, Numancia.
Base sa report, nagagamit gihapon it gin-isyu nga ID it kompaniya, uniform ag resibo ro mga suspek nga sanday Salvador Gabriel Dalmacio ag Vergil Dellano maskin nga haeos ap-at nga buean eon sanda nga nagresign halin sa nasambit nga kompaniya.
Suno kay Punong Barangay Lalaine Tan it Laguinbanua East, Numancia nga nangawa imaw bangud nga mag-eowas nga masyadong pilitaryo hay gina-insister sigon it anang ka-transaksyon nga si Dalmacio nga ipaagi sa G-cash ro anang last payment nga haeos P100,000 halin sa andang gin-loan nga kapin sa P350,000 nga ro collateral hay ro andang saeakyan.
Nagkasugot sigon sanda nga sa barangay hall lang imaw mabayad imbes nga sa andang baeay.
Kat ginbaton it mga suspek ro bayad hay dikara eon nagguwa ro mga katapo it Numancia Municipal Police Station.
Nauna kara, ginpahayag it kapitan nga bangud sa pagduda ag mabahoe nga kantidad ro anang igabayad, gindesisyunan nana nga mag-agto anay sa opisina kun sa siin personal nana nga naka-istorya ro manager ag dikara nakumpirma nga mabuhay eon nga tiempo nga bukon it konektado ro nasambit nga mga empleyado sa kompaniya.
Dugang pa nga eubus sigon nga nangawa si kapitan lalaine bangud nga ginabuytan man it mga suspek ro original nga OR/CR it andang saeakyan kabaylo it anang last payment.
Bangud sa kumpiyansa, may mga kahigayunan sigon nga nagbayad imaw sa suspek nga owa nagtau it official receipt.
Angot kara, ginatipon eon sigon it kompaniya ro tanan nga mga reklamo kontra sa suspek para sa pagpasaka it nagakaigo nga kaso.
