Ninahan ro daywang ka Filipino nurse halin sa United Kingdom National Health Service (NHS) kaibahan ro mga biktima sa nag eontad kaguluhan sa Sunderland.
Suno sa impormasyon, paadto eon sa trabaho ro mga Pinoy nurse para sa emergency cover kat maigpit sanda sa riot. Binato it mga rioters ro mga taxi nga andang ginasakyan, ag nagtuga raya it kahadlok sa mga nars.
Ginkondinar it Philippine Nurses Association UK ro insidente, sa paghambae nga nag tibyog sanda kuntra sa racism. Suno sa Grupo nga ro andanga komunidad hay nangin importante nga parte it NHS halin pa ko1969 ag kaibahan it iba pang Filipino Nurses’ Associations nga nakabase kara sa UK, sanda hay naga tibyog kuntra sa rasismo ag padayo nga pagasuportahan ro mga Filipino community kara sa UK anuman ro anda nga propesyon ag heograpikal nga lokasyon.
Ginahangkat man it grupo ro mga nars sa UK nga makipag-angot sa anda nga mga taeatapan ag pulisya kung nakakabatyag eon sanda it pag pangpaeag o kung indi nanda magarantiyahan ro andang sariling kaeowasan.
Ginglaygayan man it Philippine Embassy sa London ro mga Filipino sa UK nga mag-dahan sa tunga it kinagamo sa nasyon. Samtang, ginghambae it Secretary it State for Health and Social Care nga si Wes Streeting, nga imaw hay nagulpihan sa mga kamalat nga balita it kinagamo, nga pagataw-an it diin eon ag siguraduhon it gobyerno it Britanya nga ro mga nagkasaea sa mga krimen hay paga patawan sa n agakaigo nga laye.
