Naga-abot sa 20 nga baril nga nakarehistro kay Sen. Ronald “Bato” Dela Rosa ro boluntaryong ginsurender sa Philippine National Police (PNP) sa Davao City matapos bawion ro anang lisensya ag rehistro it baril.
Ro mga baril hay presenteng sa kustodiya it Regional Civil Security Unit 11 para sa safekeeping.
Suno sa PNP, ro pagbawi it lisensya hay sandig sa Republic Act No. 10591 ukon Comprehensive Firearms and Ammunition Regulation Act, nga nagabawae sa sin-o man nga may kasong kriminal nga may penalidad nga masobra sa daywang dag-on nga magapanag-iya it baril.
Base sa record it PNP-Firearms and Explosives Office (FEO), si Dela Rosa hay may buyot nga Type 5 License to Own and Possess Firearms (LTOPF) nga nagatau it daean sa pagpanag-iya it masobra sa 15 nga baril.
Sa kabilugan, 117 nga baril ro nakarehistro sa anang pangaean ag tanan raya hay ginmanduan nga isurender.
Ro revocation order hay ginpaguwa ko Mayo 26, 2026, kasunod it direktiba it Department of Justice nga ipatuman ro International Criminal Court (ICC) arrest warrant kontra kay Dela Rosa angot sa mga kasong crimes against humanity nga nag-ugat sa madugong kampanya kontra droga it administrasyong Duterte.
Si Dela Rosa, nga nagsirbing PNP Chief umpisa 2016 hasta 2018, hay sambilog sa mga nagapangunang personalidad nga gina-angot sa libu-libong pagkamatay sa war on drugs.
Sa pihak it revocation, ginpasiguro it PNP nga ro mga ginsurender nga baril hay magapabilin sa andang kustodiya para sa tamang disposisyon.
Padayun man nga ginabantayan it mga otoridad ro sitwasyon agud nga masiguro ro pagsunod sa laye ag mapabilin ro kaayusan sa tunga it mga kasong ginapangatubang it senador.
