KALIBO, Aklan—Mabahoe ro ginsakripisyo ni Atty. Allan Chester Nadate, residente it banwa it Malinao sa anang kaugalingon antes naging madinaeag-on sa karera nga ginpili sa anang kabuhi.
Raya hay matapos nga nagtrabaho sa sangka non government organization samtang naga-eskwela sa pagka-abogado sa University of the Philippines.
Ko una sigon hay uwa nana ginhandom nga maging abogado bangud nga ro anang kurso nga tinapos hay Nursing ag gusto kara nga maging doctor.
Apang, bangud sa engganyo man sa anang classmate hay gintistingan nana nga mag-enroll kon sa siin gintaw-an nana it limit ro anang kaugalingon hasta nga uwa eon nana nataeopangdan nga natapos eon nana ro kurso nga abogasiya.
Suno pa kay Atty. Nadate, eubus ro anang kalipay kat mabaton ro impormasyon nga sambilog imaw sa 2,103 nga mga nakapasa sa 2019 Bar examination halin sa 7,685 nga aspirants.
Imaw man sigon ro unang abogado sa pamilya.
Si Atty. Nadate hay nagtapos it elementarya sa Malinao Elementary School; nagsekondarya sa Regional Science High School for Region VI ag nagtapos it kursong nursing sa University of the Philippines kamana man sa nasambitang eskwelahan man nana natapos ro pagiging abogado.
