KALIBO, Aklan — Ginpasidunggan it Sangguniang Panlalawigan it Aklan si 2nd Lt. Joebel Quinicio nga tubong Brgy. Morales, Balete matapos nga imaw eamang ro nagaisaeahanong Aklanon nga maswerteng nakaeakip sa 261 nga MABALASIK (Mandirigma ng Bayan Lakas at Sarili Iaalay para sa Kapayapaan) Class 2019 graduates it Philippine Military Academy (PMA).
Raya hay pinaagi sa resolution of commendation nga sponsored ni Aklan 2nd district board member Jose Miguel Miraflores.
Sa regular session it SP-Aklan, gin-award kay Quinicio ro nasambit nga commendation bilang pagkilaea sa anang pagkapursigido, seryoso ag pagdaea it kadungganan sa probinsya.
Si Quinicio hay onga nanday Mr. Ronito ag Johanna Quinicio nga tumandok man it nasambitang lugar.
Nauna eon nga ginpahayag ni 2nd Lt. Quinicio nga mas ginapili kara nga magsueod sa Philippine Air Force (PAF) bangud nga gusto sigon kara nga magdaea it eroplano ukon helicopter eabi eon sa mga relief operations.
