KALIBO, Aklan—Daywa nga baeay ro totally burned samtang sambilog nga iba pa ro partially damaged sa sunog nga nag-eontad pasado alas-7 gabi-i it Biyernes sa N. Roldan Extension, Brgy. Poblacion, Kalibo bangud sa gina-alegar nga napabay-an nga kandila nga nakasindi.
Suno kay Johnny Tanesa, unga ni Violeta Tanesa, tag-ana it baeay nga gin-umpisahan it sunog nga nagsaka sa ibabaw ro andang ina ag nagsindi it kandila sa altar bilang pagdumdum sa ika-74 nga kaadlawan it andang ama nga namatay eon.
Apang sa anang pagpanaog hay nakita nanda nga may nagakatabu eon nga sunog sa ibabaw.
Owa sigon sanda it nasalbar nga gamit bangud nga masyado eon nga mabahoe ro kaeayo .
Pati suno kana ro panimaeay nanday Reynante Monggaya ag Leticia Peren hay nadaeahig man sa sunog, apang maswerteng naagapan it mga rumespondeng bombero.
Sa pihak nga parte, ginpahayag ni FO1 Janryl Magno, imbestigador it Bureau of Fire Protection ukon BFP-Kalibo nga madasig nga nagkalhit ro kaeayo bangud nga himo sa light materials ro ibabaw it baeay.
Insigida sigon nga ginpasaka sa ikaywang alarma ro sunog bangud nga himo sa mixed materials ro kaeabanan nga baeay sa lugar ag naga-ililiping pa.
Owa man suno kana it naninahan sa sunog mag-eowas sa pilang mga residente nga nalipong.
Naga-abot sa 192,375 pesos ro kantidad it kahalitan kara , apang ginaeauman nga posible pa nga magtaas sa oras nga magsumite ro mga nasunugan it affidavit of loss.
Sa makaron hay padayun ro andang imbestigasyon eakip ro pahayag it pamilya tanesa nga halin sa ginsindihan nga kandila ssa altar ro gintunaan it sunog.
