KALIBO, Aklan — Nagisa ro tatlong kandidato sa pagka-provincial board member it Aklan sa ikaywang parte it “Debate sa Bombo 2019”.
Medyu ginpulihan it Independent candidate Rodson Mayor ag opposition candidate Harry Sucgang si administration candidate Nemesio Neron matapos kara nga depensahan ro kontrobersiyal nga P1.53-billion loan it lokal nga gobyerno it Aklan sa Development Bank of the Philippines (DBP).
Ginhangkat ni Neron ro daywa nga magpakita it anumang ebidensiya nga naka-utang eon ro probinsiya pinaagi sa nasambit nga loan facility.
Insigida man raya nga ginsabat nanday Mayor ag Sucgang nga napas-eawan sanda nga maka-utang bangud nga gin-kwestiyon nanda raya sa korte.
Nasayuran nga antes pa gin-aprubahan it provincial board, pilang kritiko ro kumuwestiyon sa integridad it pagahimuon nga pag-utang bangud sa nagahilapit nga 2019 national ag local election.
Samtang, pila pa sa mga natalakay sa debate hay ro angot sa gin-aprubahan nga Revenue Code it Aklan ko 2017, kun sa siin, tumaas it 50 porsiyento ro real property taxes sa commercial area kaibahan ro isla it Boracay.
