Ginharang it Bureau of Immigration (BI) sa Ninoy Aquino International Airport (NAIA) ro tatlong Malaysian nationals nga ginadudahan nga miyembro it Kingdom of Jesus Christ nga nakasueod kunta sa Pilipinas.
Ro tatlo hay nag-abot sa nasyon kaibahan ro grupo it mga pinoy ko Agosto 27, halin sa Kuala Lumpur apang gin aywanan eon lang it mga kaibahan kat i-refer raya para sa immigration inspection.
Ginkilaea ro mga raya bilang sanday Jessica Lynn Henry, Mimielianna Annie Anak Leesoi ag Andrijosebaul Anak Garra.
Suno kay BI Commissioner Norman Tansingco, nadiskubre it Immigration officers nga planong maghimo ko mga raya it anti-government demonstration kaibahan ro iba pang taga sunod it puganteng pastor nga si Apollo Quiboloy ag sa pihak it padayon nga manhunt operations it awtoridad kay Quiboloy ag sa ap-at pang kaibahan nga akusado.
Pagpaathag it Malaysian nationals, gin imbitahan sigon sanda sa Davao City it KOJC apang uwa raya it mapakita nga patunay it andang fianancial capacity para suportahan ro andang pag tinir sa nasyon ag katnagbuhay hay gin-ako eon man nga sanda hay mga uwa it trabaho.
Sambilog man sa mga pasahero ro nakitaan it screenshot nga nagasueod it nagakasari-sari nga anti-government slogan, kapareho it “BBM Resign,” “Stop KOJC Injustices,” ag “AFP/PNP Protect the People.”
Kat kuntan-on raya angot sa screenshot, gihambae it pasahero nga aksidente kara nga na-download ro mga slogan halin sa anang mga social media account.
Presente eon makaron nga naka-immigration blacklist ro tatlong Malaysian ag ginbawaean nga makasueod it uman sa Pilipinas it Bureau of Immigration.
