Naninahan ro tatlong katawo matapos araduhon it sangka kotse ro tatlong iba pang saeakyan eakip ro patrol car it Kalibo Municipal Police Station nga naka-park sa guwa it andang police outpost sa entrance it Kalibo-Numancia Bridge sa Roxas Avenue, Kalibo, bandang alas-2:15 aga-aga it Lunes, Abril 27.
Base sa report it Kalibo MPS, ginamaneho it sangka 47 anyos nga eaeaki nga residente it Brgy. Laguinbanwa East, Numancia ro sangka Toyota Vios Sedan nga nag-counter flow sa tulay halin sa banwa it Numancia paagto sa banwa it Kalibo.
Dikara sunud-sunod nana nga gin-arado ro mga nakaparadang saeakyan sa guwa it outpost ag pilang katawo sa lugar ro nadaeasa.
Mag-eowas sa patrol car, kaibahan pa sa nadaeahig hay ro Hyundai Eon kamana man ro sangka motorsiklo.
Kaibahan man sa mga naninahan ro sangka miyembro it Kalibo Auxiliary Police.
Gindaea sa Aklan Provincial Hospital ro mga biktima, kaibahan eon ro suspek.
Nagapangatubang ro suspek sa kasong Double Physical Injury ag Reckless imprudence resulting to multiple damage to property.
Padayun pa ro imbestigasyon it kapulisan sa insidente.
