KALIBO, Aklan—Arestado ro sangka 32 anyos nga hair stylists sa ginpatigayon nga buy-bust operation bandang alas-11:15 kaina it agahon sa Sitio Tulubhan, barangay Manocmanoc sa isla it Boracay.
Nakilaea ro suspek nga si Eewe Alidon, tubong Cebu ag temporaryong naga istar sa nasambit nga lugar.
Suno kay P/Lt. Joven Vega it Malay Municipal Police Station nga matapos nga uman nga magbukas ro isla it boracay hay nakabaton sanda it impormasyon nga nagaduso raya it illegal nga droga rason nga ginpaidaeum nanda sa surveillance.
Base sa report nagpatigayon it buy-bust operation ro Malay PNP ag Philippine Drug Enforcement Unit ukon PDEA kontra sa suspek sa anang gina-istaran ag nabak-ean raya it sangka sachet kabaylo it marked money nga 500 pesos.
Nakumpiska kay Alidon ro ap-at nga iba pang sachet nga nakasueod sa pouch sa pagkapkap kana kaibahan ro tatlong bala it 9mm.
Emosyunal man nga ginpamalibaran ni alidon nga nagaduso ag nagagamit imaw it illegal nga droga.
Apang suno kay Lt. Vega nga nagamit sanda it body camera sa andang ginkasa nga operasyon.
Ro nasambit nga mga recoveries sigon hay pagagamiton nanda nga ebidensiya kontra sa suspek sa pagpasaka it reklamong pageabag sa Comprehensive Dangerous Drugs Act of 2002 ukon Republic Act 9165.
Nasayuran nga ko 2009 pa ro suspek nagatrabaho sa boracay apang haeos sang buean pa eamang imaw nga naga-istar sa sitio tulubhan.
Nauna eon raya nga ginreklamo it anang mga kaeapitbaeay bangud nga masyadong masangag sanda kon gabi-i kaibahan ro anang mga naga-agto nga bisita.
Madumduman nga nauna eon nga gindeklarang drug cleared ro tatlong barangay sa Boracay.
