Nag-abot ko adlaw it Sabado, Abril 4, 2026 ro cruise ship nga MS Adora Mediterranea sa isla it Boracay kon sa siin raya ro kauna-unahan kara nga pagbisita sa isla.
Halin sa Xiamen, China ginatantyang may sakay raya nga masobra 1,400 nga pasahero ag kapin sa 700 nga crew nga kaeabanan hay mga Chinese national, nga gustong maeksperyensyahan ro kilaeang kaanyag it Boracay.
Raya man ro unang cruise ship nga nagbisita sa isla makaron nga buean it Abril.
Ginpatigayon ro sangka plaque exchange ceremony sa tunga it pamunuan it barko ag natungdan nga opisyales it gobyerno bilang kaparte it pag-abi abi.
Gintambungan raya it mga representante halin sa lokal nga gobyerno it Malay, gobyerno probinsyal it Aklan, Department of Tourism Region VI, ag iba pang sektor it turismo.
Suno sa mga opisyal, pamatuod ro pag-abot it nasambit nga cruise ship sa padayon nga pag-umwad it Boracay bilang nagapangunang destinasyon sa pangakalibutanong turismo.
Samtang, nailista ro kabilugang 200,165 tourist arrival sa Boracay ko buean it Marso sa tunga it ginapangatubang nga energy crisis it nasyon bangud sa nagapadayon nga Middle East tension.
Sa nasambit nga numero, 164,922 ro domestic tourist; 2,318 ro overseas Filipinos ag 32,925 mat-a ro foreign tourist.
May kaangtanan kara, nagapabilin nga maumwad ro turismo sa isla kapin eon ag gintampok ro Boracay sa B2B Tourism Engagement Program 2026 sa Kuala Lumpur, Malaysia, pagbalik it mga international cruise ship ag domestic travelers.
