Kalibo Aklan ——Arestado ro sangka eaeaki matapos madakpan nga owa nagasuksok it facemask ag nagbayolar sa COVID-19 curfew ordinance bandang alas 11:40 kabi-i sa bahin it F. Quimpo Street, Brgy. Poblacion, Kalibo.
Ginkilaea ro suspek kay Mark Allan Carillo, 35-anyos, residente it Brgy. Camansi Sur, Numancia.
Base sa report, naaktuhan it mga katapo it Barangay Tanod it Poblacion, Kalibo si Carillo nga sakay it anang motorsiklo sa nasambitang lugar sa oras it curfew ag owa pa it suksok nga facemask.
Bangud kara hay ginpaeapitan imaw it mga natungdan ag gin-usisa sa anang rason sa pagpabilin sa guwa it panimaeay ag gin-impormahan sa anang naging pag-eabag.
Maskin nga ginbutang eon sa low risk status it Modified General Community Quarantine (MGCQ) ro bilog nga probinsya it Aklan, nagapadayun pa gihapon ro mga polisiya nga nauna eon nga ginpatuman it gobyerno agud malikawan ro posibleng pagtaeapnan it Coronavirus Disease ukon COVID-19 pandemic.
