KALIBO, Aklan — Nagguwa sa follow up investigation it Kalibo Police station nga accidental firing ro natabo sa sangka 35 anyos nga misis nga si Giselle Nadate it Sitio Kawatihan, Brgy. Pook, Kalibo.
Raya hay kasunod it pag-voluntary surrender it anang mister nga si John Nadate ag pagturn-over it sangka calibre .45 nga baril.
Suno kay SPO1 Charlyn Flores it Kalibo PNP, ginapahayag sigon it eaeaking Nadate nga nagapanglimpyo eamang imaw it nasambitang baril apang aksidente kara nga natabing ro gatilyo rason nga eumupok ag haigo ro anang asawang nagabuead it linabhan.
Dugang pa ni SPO1 Flores, hauna eon nga nagpabalibad nga magpa-paraffin test ro mister it biktima apang nagdesisyon nga boluntaryong magsurender agud nga indi eon magbahoe pa ro problema.
Sa pihak nga parte, ginpahayag ni SPO1 Charlyn Flores it Kalibo PNP nga matapos masayuran ni misis Giselle Nadate nga nagsurender ro anang asawa nga si John Nadate hay insigida raya nga nagtangis.
Nauna kara, uwa naga senanto ro pahayag it mag-asawa sa minatuod nga natabu.
Ginpahayag it misis nga uwa imaw naila nga makulong ro anang mister.
Apang, matapos ro pilang pagpangutana ni SPO1 Flores sa misis, mismong ginpahayag kara nga nagalimpyo gid man it baril ro anang asawa ag eumupok.
Insigida man sigon imaw nga nagdaeagan sa unahan it andang may buearan ag nataeupandan kara nga may dugo eon ro anang siki.
Bangod kara, insigida man imaw nga gindaea it anang asawa sa ospital.
