KALIBO, AKLAN — Gin baril-patay sa anang ueo ro sangka 35 anyos nga padre de pamilya samtang naga katueog sa andang payag-payag kabie.
Ro biktima hay gin kilaea kay Julius Amparo ag residente it Brgy. Libas, Banga.
Nasapwan eon lang nga dimos it dugo ro uyahon it biktima kamana man ro anang haboe.
Inisyal nga na-recover sa crime scene ro daywang ka mga empty shells it gina patihan nga .45 caliber pistol kamana man it wasak nga kulay itom nga PVC pipe kun sa siin gina panan-aw nga raya ro gin himo nga improvise silencer it suspect kabangdanan nga owa gid it nabatian nga eupok ro mga kaeapit-baeay apisar nga dukot-dukot ro panimaeay sa nasambitan nga lugar.
Ulihi sigon nga nakita ni Emily Gindoy ro anang igmanghod kabie matapos nga anang gin hatdan it ihapon kun sa siin nagpabakae pa sigon kana raya it bueong bangud sa gina rayuma.
Gin kangawa eamang sigon kara kat alas-6:30 eon kaina it agahon hay owa sa gihapon naga asu ro dapog it biktima rason nga anang gin agtunan.
Sa pag-chekyar nakita kara nga duguon eon ro anang igmanghod rason nga insigida man nga nagpangayu it bulig sa kapulisan.
Owa man suno kay Mrs. Gindoy it may na-mensyonar ro anang igmanghod kana nga may mga nakaaway raya.
Nasayuran nga ro biktima hay nagatrabaho sa isla it Boracay bilang sangka cook.
Samtang, nasayuran nga ku kabie kat matabo ro krimen hay nakaiping pa magtueog it biktima ro kamanghuran nga ungang eaeaki kara nga si Marledge.
Gin pahayag man it nasambitan nga unga nga owa gid imaw nakabatyag ag nakasayod sa natabo sa anang ama mag-eowas eamang sa magkadunghan sandang nagkatueog kara bandang alas-10:00 eon ro pang orason kabie.
Samtang, naga padayun man sa makaron ro imbestigasyon it kapulisan sa pagpanguna it Banga MPS ag SOCO-Aklan sa natabong insidente.
