KALIBO, Aklan–Presenteng naka-confine sa Intensive Care Unit (ICU) it Aklan Provincial Hospital ro sangka 36-anyos nga eaeaki matapos nga makapilang beses nga gin-eabo it anang kasimaryo sa Brgy. Kinalangay Nuevo, Malinao.
Nakilaea ro biktima nga si Darius Zaspa samtang ro suspek hay nakilaea kay Jasen Retubis, 25-anyos, parehong residente it nasambit nga lugar.
Suno kay Police Lieutenant Gilbert Batiles, hepe it Malinao Municipal Police Station nga halin sa birthday party ro magtimbang nga parte kung siin samtang naga-inum hay may nagpatunga kanda nga diskusyon matapos nga buslahan it suspek ro biktima angot sa ginhimo kara nga krimen sa anang tiyo may pilang dag-on eon ro nagtaliwan.
Ro daywa hay parehong una sa impluwensya it makahieilong ilimnon kung siin samtang nagapauli sanda hay gulpi eamang nagbugnot it sanduko ro suspek ag gilayon nga gin-eabo ro biktima it makapilang beses.
Bangud kara, ro biktima hay nag-angkon it nagkaeain-eain nga lastro sa eawas.
Insigida man nga gindaea sa ospital ro biktima para sa nagakaigo nga pagbueong.
Samtang, ro suspek hay gilayon man nga nadakpan sa andang panimaeay matapos ro ginpatigayun nga hot pursuit operation it Malinao PNP.
