Kalibo Aklan ——Ginkalipay it lokal nga gobyerno it Malay ro naging anunsyo it Provincial Health Office (PHO) sa ginpatigayon nga press conference kahapon nga adlaw kon sa siin fully recovered eon sa sakit nga 2019 coronavirus infectious disease (COVID-19) ro 37-anyos nga frontliner halin sa nasambitang banwa.
Suno kay Madel Joy Tayco, Deputy Information Manager it Inter-Agency Task Force against Covid-19 (IATF) nga eubus nandang ginakalipay ro pag negatibo sa sakit it frontliner sa daywang repeat testing nga ginhimo kana.
Sa makaron sigon hay uwa pa sanda kasayod kon anu ro plano it nasambitang frontliner bangud nga bukon raya it residente it banwa kundi nagatrabaho eamang sa sangka ospital sa Isla it Boracay.
Samtang sa pihak nga parte, amat-amat eon nga nagabukas ro ibang negosyo sa Isla it Boracay halin kat ginpaidaeom ro bilog nga probinsya it Aklan sa General Community Quarantine (GCQ).
Apang, ginklaro kara nga uwa pa nagabaton it mga bisita ro Isla para eon man sa kaeowasan it mga residente.
Ginpadumdom man kara ro mga workers nga gustong magbalik sa trabaho nga kinahang-ean it andang employeer nga mag-coordinate sa Pubic Employment Service Office (PESO)-Malay agud nga mamonitor ro bulto it tawo nga nagasueod sa Isla.
Samtang, ro mga residente nga naabutan it lockdown sa mga kaeapit nga banwa ag gusto eon kara nga mag-uli sa banwa it Malay hay kinahang-ean nga magsikyar it health certification halin Municipal Health Office it banwa nga temporaryong gin-istaran ag acceptance letter halin sa Barangay nga gina-ulian para mapaagi sa eksakto nga proseso ro tanan.
