Kalibo Aklan ——–Ginkumpirma ni Capt. Cenon Pancito III, tagapaghambae it 3rd Infantry Division nga nakabase sa Camp Hernandez, Dingle, Iloilo nga namatay sa engkwentro sa tunga it Philippine Army ag New People’s Army (NPA) nga naidentified nga Komiteng Rehiyon-Panay si Private First Class Mark Nemis, residente it Barangay Galicia, Madalag.
Suno kana, nakaengkwentro it tropa ro kapin sa 20 ka mga rebelde sa Sitio Aguilan, Brgy. Panuran, Lambunao, Iloilo bandang alas-5:45 it agahon, Abril 7.
Antes sigon ro natabo nga engkwentro, nagreport ro mga residente sa otoridad nga may nataeopangdan nga mga miyembro it NPA sa lugar rason nga insigidang naghueag ro mga soldado agud nga magmanman hasta nga nakumpirma ro nasambitang report.
Nagbuhay it kapin sa 20 minutos ro baeayluhan it eopok hasta nga ko ulihi hay narekober ro eawas ni Nemis nga uwa eon it kabuhi.
Mag-eowas kara, narekober man sa area ro sangka back pack nga may mga dokumento ag armas.
Posible suno kana nga may namatay ukon naninahan sa mga kontra matapos ro engkwentro.
Samtang sa pihak nga parte, hugot nga ginakondina it Philippine Army ro natabo bangud nga gintake advantage it mga rebelde ro kahigayunan nga masako ro mga otoridad sa pagbulig sa lokal ag National Government kontra sa 2019 coronavirus disease (COVID-19) pandemic.
Ginpasiguro ni Pancito nga magapanabat ro mga rebelde ag siguraduhon nanda nga maangkon ni Nemis ro hustisya.
Sa pihak it pagkamatay ni Nemis, ginpasiguro kara nga inde sanda magsurender ag padayon nga magapanerbisyo para sa kaeowasan it mga pumueoyo kontra sa mga rebeldeng NPA.
