KALIBO, Aklan — Patay ro ap-at nga treasure hunter matapos nga aksidenteng maeumos sa madaeum nga parte it ginakutkot nanda nga tunnel nga maeapit sa sapa kahapon it agahon sa Brgy. Lawaan, New Washington, Aklan.
Kaibahan sa mga namatay sanday Rene Felizardo; Jodel Felizardo, 47; kamana man si Darwin Cuesta, 48; puro mga residente it nasambit nga lugar ag sangka albularyo nga nakilaeang si Hermenio Bantang ag naga-istar sa Brgy. Bubog, Numancia, Aklan.
Base sa inisyal nga imbestigasyon, unang narekober it search and rescue team ro bangkay nanday Darwin ag Jodel sa kutkot nga may kadaeumon nga ginatantiya nga 40 feet.
Masunod nga narekober ro bangkay ni Hermenio ag inabot man it hasta alas-4:00 it hapon antes nga nabo-oe ro bangkay ni Rene.
Natabu sigon ro makangieidlis nga insidente samtang nagakutkot ro mga biktima sa tunnel sa sangka private property sa lugar.
Nasayuran nga pilit nga nagbutwa si Bantang sa tunnel bangud sa indi eon mapugngan nga pagsueod it tubi-dagat daea it high tide rason nga insigida raya nga nagpangayo it tabang.
Apang maskin ro tatlong kaibahan kara nga naghana nga magbulig kana hay nahueog man sa madaeum nga kutkot nga naging kabangdanan it andang hinali nga kamatayon.
Nasayuran nga haeos sang dag-on eon ag tunga ro ginahimo nga pagkutkot sa nasambit nga lugar.
