KALIBO, Aklan —Ginbasura it Sandiganbayan ro ap-at nga kasong kriminal nga ginpasaka kay Governor Florencio Miraflores ag asawang si dating Ibajay Mayor Ma. Lourdes Miraflores kaangot sa Statement of Assets Liabilities and Networth SALNs matapos ro “inordinate delay” sigon sa pag-imbestiga ag pagdihon it kaso sa Office of the Ombudsman.
Kadungan it ginpaguwang desisyon ko Nobyembre 14, 2018, ginduea man ni Associate Justice Michael Frederick Musngi ro hold orders nga naunang gin-imponer sa mag-asawang Miraflores.
Suno sa Sandiganbayan nga ro atrasadong imbestigasyon it Ombudsman nga naabot it haeos waeong dag-on sa pag-eabag sigon it mag-asawa sa RA 6713 ukon The Code of Conduct and Ethical Standards for Public Officials and Employees hay pag-eabag sa kinamatarong it mga akusado para sa madaliang paglilitis.
Nasayuran nga ginkasuhan ro mag-asawa sa uwa pagdeklara sa andang SALN ro haeos P6-million nga investments sa sangka lokal nga bangko ag ap-at nga saeakyan.
