KALIBO, Aklan — Mismong ro tricycle driver nga ginsakyan it ap-at nga babayeng miyembro it “Budol-budol gang” kaibahan ro sangka menor de edad ro nagdaea sa mga raya sa Kalibo Municipal Police Station, agahon it Lunes, Agosto 12, matapos nga biktimahon ro sangka negosyante nga sari-sari store owner rason nga insigida sanda nga naaresto.
Nakakulong eon sa custodial facility it nasambit nga police station ro mga suspek nga ginasugid nga puro tumandok it Cavite ag temporaryong naga-istar sa Pandan, Antique matapos nga magpasaka it reklamo ro 55 anyos nga si alyas Myrna, residente it Brgy. New Buswang, Kalibo .
Base sa report, owa eon it nahimo ro mga suspek matapos nga bitbiton ro mga raya sa presinto it tricycle driver nga andang ginparahan.
Sa panaysayon it negosyante, gin engganyo imaw it mga suspek nga ibaligya ro anang mga tinago nga “20 peso coin” bangud nga ginabakae nanda raya sa balor nga P2,000 kada sambilog ag bilang pruweba ginhuyapan pa imaw it sangka bugkos it kwarta nga nagabalor it P50,000.
Nakumbinse man sigon ro biktima nga ibutang sa sangka plastic container ro anang mga alahas nga ginpatakan it mga suspek it sangka chemical solution agud nga matumod kon raya hay genuine hasta nga nakaangkon it damage ro mga raya .
Nag-insister sigon ro mga suspek nga bayran it P3,000 ro nasamad nga mga alahas apang owa nagpasugot ro biktima bangud nga may mataas nga balor ro anang mga alahas.
Sa pagpaeagiw it mga suspek bitbit ro alahas, nag-aywan ro mga raya it P10,000 sa lamesa sa guwa it baraka it biktima.
Gin-eagas it negosyante sakay it anang motorsiklo ro ginsakyan nga tricycle it mga kababayin-an ag gin-singgitan ro driver nga daehon ro mga raya sa police station bangud nga manugloko ro mga raya .
Nadakpan ro mga suspek ag nabo-oe sa andang posisyon ro tatlong bag nga may parehong kulay ag design; P100,000 nga cash; 3 digital scale, plastic container nga may chemical solution; 2 longnose; mga old coins; alahas; cellphone ag iba pa.
Kasong Other Forms of Deceit ro nakataeanang ipasaka sa ap-at nga suspek samtang pagapahilwayon ro menor-de-edad .
