POLICE Report — Napuno it kasubo ro mga ginikanan sa gindangatan it ap-at nga mga unga puro mag-iligkampod matapos sanda nga maeumos samtang nagapaligos sa bag-o eamang nga gin-obra nga fishpond sa Barangay Bannawag, Diffun, Quirino.
Ro namatay hay ro magmaeanghud nga residente it La Paz, Saguday, Quirino kaibahan ro andang daywang igkampod nga residente it Barangay Bannawag, Diffun, Quirino.
Suno sa ginikanan it mga biktima pasado alas-2 it hapon hay nagahampang pa ro mga raya sa andang baeay apang pasado alas-3:00 it hapon kat indi eon nanda makita ro mga raya.
Bangud kara, nagdesisyon sanda nga mag-agto sa bukid kun sa siin may gina-obra nga fishpond nga may habang 15 metro ag daeum nga kapin sa 3 metro.
Dikara, naabutan nanda ro mga owa eon it kabuhi nga mga biktima nga naga-eutaw-eutaw sa tubi.
Haeos mahugos ro kalibutan it mga ginikanan it ap-at nga mga unga nga nagbueuligan kaibahan ro iba pang mga tawo sa lugar agud nga mahaw-as ro mga unga nga naeumos.
Nasayuran nga antes ro insidente hay nagsakay pa sigon ro mga unga sa sangka kariton paagto sa fishpond ag nagpaligos apang owa sigon nasayuran it mga biktima nga madaeum ro tangke.
Samtang, posibleng sa init it tiempo nga naeksperyensiyahan hay naka-isip ro mga unga nga magpaligos.
Padumdum it mga awtoridad sa publiko nga pirmeng bantayan ro mga inunga eabi eon kon sa guwa it baeay ag nagapaligos sa mga suba, dagat ukon mga swimming pool.
