KALIBO, Aklan – – – Patay ro sangka construction worker matapos bun-on it kapareho man nga construction worker sa andang barracks sa barangay Balabag, Boracay.
Namatay samtang gina-revive sa sangka klinika sa isla ro biktima si Rodel Villamor, 42, tumandok it Tablas, Romblon.
Nag-angkon it lastro it pagpambuno sa waea nga kilid ro biktima.
Base sa initial nga imbestigasyon it Boracay Tourist Assistance Center (BTAC), magka-ibahan nga nagapatigayon pag inom-inom ro biktima ag ro suspek nga si Eldie Abinasa, 39, tumandok it Masbate.
Apang, nag-angkon sigon it komosyon sa tunga it magtimbang nga parte nga nagresulta it uwa pagka-intindihan.
Ginasugid nga gin-adtunan it suspek sa anang barracks ro biktima ag ginbuno it daea nga siyaw.
Uwa man narekober ro siyaw nga gingamit sa krimen.
Sa makaron hay nakadetine eon sa BTAC PNP ro suspek samtang nagapadayun man ro imbestigasyon it mga kapulisan.
