Kalibo Aklan ——Kapin sa 456 fisherfolks ro nag-avail it loan sa idaeom it Agricultural Credit Policy Council (ACPC) pinaagi sa Bureau of Fisheries and Aquatic Resources ( BFAR).
Suno kay Victoria Magalit it BFAR-Aklan, ro ACPC hay sangka programa it gobyerno kon sa siin ginabuligan kara ro mga mangingisda nga gustong mag-utang sa haeaga nga 25,000 pesos kada mangingisda nga sarang mabayaran sa sueod it 14 anyos.
Ro gin-una sigon kara nga pondohan hay ro banwa it Altavas, Batan ag New Washington kon sa siin nakataeana ro kapin sa 11.4 milyon pesos nga pondo.
Ro kwarta suno kay Magalit hay ginadownload sa mga accredit conduits ukon kooperatiba nga nahamtang sa banwa it New Washington, Libacao, lezo ag Madalag.
Raya hay continuous nga programa it gobyerno nga unang gintanyag ko nagtaliwan nga dag-on kasunod it pagpanaeasa it bagyog Ursula bilang bulig sa mga fisherfolks nga may palaisdaan ag mga maintok nga mangingisda.
Antes sigon maka-avail sa nasambitang programa hay kinahangean nga nakarehistro sa tagsa nanda ka Municipal Fisheries Office kamana man may lisensya ro andang ginadumaeahan nga palaisdaan.
Ro mga banwa sigon nga uwa pa napondohan hay inde magkabaeaka bangud nga magaabot gid ro para kanda.
Samtang, nakapanupod eon ro ahensya it mga semilya it isda sa mga kwalipikadong fisherfolks nga may mga fish ponds bilang bulig kanda sa halit nga gin-aywanan it bagyong Ursula.
