Kalibo Aklan —-Pagkatapos nga makompleto ro daywang domingo nga quarantine , insigidang iga-deploy sa andang natungdan nga assignments ro 50 nga mga pulis halin sa training camp sa Sara, Iloilo agud nga maka-augment sa Anti-COVID Campaign sa probinsiya it Aklan .
Suno kay P/Staff Sgt. Jane Vega, tagapaghambae it Aklan Police Provincial Office (APPO) nga ro nasambit nga mga pulis nga puro nga Akeanon hay presenteng nagatinir sa kampo umpisa nga mag-abot sanda ko Mayo 22.
Maskin nga makabig nga clean zone suno kana ro andang ginhalinan nga kampo hay nagpaidaeum gihapon sanda sa medical evaluation ag rapid testing bilang pagsunod sa protocol.
Ginpahayag dugang nga ro nasambit nga augmentation force hay iga deploy para sa hugut nga pagpatuman it “New Normal Situation” base sa gin-amyendahang Executive Orde No. 23 series of 2020.
