NATIONAL News — Mas maabu ro mga Pilipinong nagapati nga dapat pasabton si dating Pangueong Rodrigo Duterte sa extrajudicial killings (EJK) nga ginhimo sa ngaean it anang `war on drugs.’
Suno sa survey nga ginpatigayon it Social Weather Stations (SWS) para sa Stratbase Group ko Pebrero 15-19 sa 1,800 nga respondents, 51% ro naghambae nga dapat nga pasabton ro dating pangueo sa pagpatay it mga tawo sa anang giyera kontra ilegal nga droga samtang 25% eamang ro owa nagapabor.
Maskin sa Mindanao nga balwarte ni Duterte, 47% ro naghambae nga dapat imaw nga pasabton ag 28% eamang ro bukon it pabor kara.
Sa Visayas nga ginapatihan gihapon nga kaparte it anang balwarte, pinakamaabu ro naghambae nga dapat imaw nga magapanabat nga kapin sa 62% it respondents ag 17% eamang ro naghambae nga indi imaw dapat nga pasabton.
Sa Luzon, mag-eowas sa National Capital Region (NCR), 49% ro nagapati nga dapat imaw nga magapanabat ag 33% man ro naghambae nga indi.
Kapin sa 45% man it taga NCR ro naghambae nga dapat imaw nga magapanabat ag 12% eamang ro naghambae nga indi.
Ginpahayag ni Stratbase president Dindo Manhit, importanteng haligi it demokratikong sosyudad ro pasabton ag ipatuman dapat ro laye sa tanan nga oras.
Hustisya ro tawag sa pagpasabat sa mga may kasae-anan ag bukon it pagbaeos.
