KALIBO, Aklan—Matsa balik eon sa normal ro sitwasyon sa banwa it Kalibo matapos nga ginhaeugaan ro pilang restrictions  sa idaeum it extended general commumity quarantine umpisa Mayo 16.

Bumuhos ro mga tawo  sa mga nagapangunang karsadahon  ag uman nga naggutok ro daeagan it trapiko.

Mataeupangdan man ro pagpila it mga nagabakae it mga makahieilomg nga ilimnon pagkatapos nga ginbawi eon ro liquor ban.

Maskin nga ginbungkag eon ro tatlong mga checkpoints pasueod sa Kalibo hay padayun nga may nakabantay nga mga pulis nga nagasita  sa mga naga-eabag sa traffic rules eabi eon ro pagmaneho nga owa it drivers license ag owa it suksok it helmet sa mga motorcycle rider.

Nasayuran nga sa GCQ  hay ginapatuman kara ro “new normal”  makaron nga tiempo it COVID-19 pandemic.

Sa ginpaguwa nga Executive Order no.  25 ni Governor Florencio Miraflores hay  nakaangkon it sangkiri nga paghaeuga ag gin pasugtan ro pilang sektor nga mag-operate ag makapagtrabaho ro andang empleyado.

Ginpasugtan nga magbukas ro malls, apang para sa non-leisure shops eamang.

Ginpasugtan man nga magbiyahe  ro pilang  transport groups, apang sa limitadong kapasidad eamang it mga pasahero ag kinahangean sa gihapon nga sundon ro  social distancing.

Nakabaehag pa sa EO nga bawae magguwa it baeay ro  mga unga hasta  20-anyos, ag senior citizens umpisa 60-anyos pataas  bangud nga ro mga raya ro ginatawag nga  “high risk” individuals nga madaling dapuan it  virus ag infections.

Ginpadumdum man it gobernador nga  may naga-eksister sa gihapon  nga quarantine  nga nagatuyo nga mabawasan ro kontaminasyon ag pagkatapon it mga tawo rason nga dapat sa gihapon nga sundon ro health safety protocols.