KALIBO, Aklan—Nag-abstain si Aklan 1st district congressman Carlito Marquez sa kontrobersiyal nga anti-terrorism bill nga aprubado sa manaba nga kapueungan it kongreso.
Suno kay Marquez nga ko una hay yes ro anang boto sa nasambit nga proposed bill, apang ko ulihi hay ginbawi nana matapos owa pa nabasa it husto.
Pila sigon sa mga section it provision kara hay owa nana ginapaburan ag bukon it klaru kana ro mga rason.
Nagakabaeaka sigon imaw nga posibleng maapektuhan kara ro Boracay bangud may sangka provision sa hagna nga makabig nga terroristic act ro pag diskarga it mga hazardous waste nga nagatuga it kahalitan sa palibot.
Nasayuran nga ro House Bill 6875 hay nakabo-oe it 173 nga pabor nga boto halin sa mga kongresista.
Mataeupangdan nga 31 ro nagkontra ag 29 ro nag-abstain maskin pa nga sertipikado raya ni Pangueong Rodrigo Duterte bilang urgent.
Pila sa mga owa nagpabor hay kaapin it administrasyon.
Base pa sa records it Kamara, 15 ro nag atras sa pagka-co-author.
Bangud nga pareho eon ro bersyon it daywang kapueungan, owa eon it bicameral meeting rason nga diretso eon raya nga pagapapirmahan kay Duterte.
