KALIBO, Aklan—Nagaeaum si provincial administrator Atty. Selwyn Ibarreta nga magiging negatibo ro resulta it real-time polymerase chain reaction ukon RT-PCR test it 54 nga katawo nga nakasalamuha it 26 anyos nga tawuhan it Bureau of Fire Protection ukon BFP region 6 nga COVID-positive sa andang pag-agto sa isla it Boracay ko nagtaliwan nga Hunyo 12 hasta it 14.
Raya hay agud nga maduea eon ro mga pagkabaeaka it publiko.
Nagapati man si Atty. Ibarreta nga bukon it pagsabotahe sa ekonomiya it probinsiya ro andang ginhimo bangud nga natiempo raya sa nakataeanang pagbukas it isla sa mga turistang nagahalin sa Western Visayas.
Natiempuhan eamang suno kana nga naging kampante ro pasyante ag ro anang senior officer nga si BFP 6 Regional Dir. FSSupt. Roderick Aguto rason nga gin-eabag ro quarantine protocol.
Ginpahayag dugang nga kon naga–instrikto sa mga sibilyan hay mas dapat nga magsunod sa patakaran ro mga otoridad nga tagapatuman it laye.
Nasayuran nga antes sa Boracay hay nag-agto pa ro grupo sa Anini-y, Antique para sa “despidida” party, kaibahan ro babayeng fire officer nga nagpositibo sa COVID 19.
Mag-eowas kay FSSupt. Aguto, gin-relieve man ni DILG Sec. Eduardo Año ro 28 nga iba pang personnel it BFP Region 6 bangud sa pageabag sa quarantine protocols.
Igabutang ro mga raya sa floating status samtang ginapatigayon ro imbestigasyon.
