KALIBO, Aklan — Pitong katawo ro gin-aresto it Aklan Police Provincial Office matapos maaktuhang nagapatigayon it ilegal nga sugae sa sangka bilyaran sa Brgy. Poblacion, Kalibo, gabi-i it Sabado, Oktubre 10.
Ginpangunahan ni PLTCOL Dennis Laurence Bautista it Provincial Intelligence Unit (PIU) ro operasyon. Ro mga naaresto hay nagapang-edaron it 22 hasta 52 anyos nga ginaeakipan it mga manughampang it bilyar, sangka umpire ukon referee, ag sangka pustador.
Suno sa kapulisan, nadakpan ro mga suspek nga nagahampang it bilyar nga may pustang kwarta maskin nga owa it nagakaigo nga lisensya ukon permit halin sa natungdan nga ahensya it gobyerno.
Nakumpiska sa operasyon ro sangka lamesa it bilyar, mga bola ag cue stick, billiard chalk, triangle rack, mechanical bridge, ₱3,800 nga ginadudahan nga kwartang naghalin sa sugae, ag daywang tig-₱100 nga marked money.
Padayun ro kampanya it kapulisan kontra sa mga ilegal nga sugae sa probinsiya it Aklan.
