KALIBO, Aklan—Nagakalisod eon ro mga overseas Filipino workers (OFW’s) sa nasyong Espanya.
Raya hay matapos nga nawad-an sanda it trabaho kasunod it epekto it 2019 coronavirus disease ukon COVID-19.
Suno kay Bombo International Correspondent Roland Decena, tubong Occidental Mindoro apang nagatrabaho sa Barcelona, Spain nga haeos daywang dominggo eon nga naka-lockdown ro bilog nga Espanya rason nga uwa eon sanda it trabaho bangud nag nagsarado eon ro andang kompanya.
Ro mga trabahador hay gobyerno eon ro nagapasweldo apang 70 percent eamang ro masarangan nga maitao it gobyerno ag ro 30 percent hay nakadepende eon sa kompanya kon ita-o raya ukon inde.
Kapareho sigon kana hay 15 percent eamang ro ginata-o it andang kompanya ag ro 70 percent hay sa gobyerno eon nanda ginasalig.
Ko unang dominggo it lockdown hay nagpanic buying ro mga tawo apang uwa man raya nagbuhay bangud nga bastante ro supply it pagkaon sa Barcelona, Spain.
Hugot sigon ro padumdom it gobyerno nga ipatuman ro “stay at home” ag social distancing agud nga inde eon magkalat pa ro virus.
Ginpahayag dugang nga sandang mga Pilipino sa Espanya hay uwa nagakabaeaka sa andang kaugalingon bangud nga bastante ro pagkaon maskin magduhong sa sueod it baeay ag kinahang-ean nga sundon ro polisiya it gobyerno.
Ro ginaisip sigon nanda makaron hay ro andang mga himata iya sa Pilipinas nga apektado man it lockdown.
