KALIBO, AKLAN— Arestado sa sangka entrapment operation nga gin patigayun it Kalibo PNP ag 12th IB Philippine Army sa Magsaysay Park si Sammy Ocate 71 anyos ag tumandok it Negros Occidental bangud sa modus nga pagpangloko.
Gin dakop si Ocate bangud sa pagtanyag kara it permit to carry firearms sa mga sibilyan kamana man sa mga reservists it Philippine Army pinaagi sa pag isyu kara it mission order maghalin sa pamunuan it PNP nga makabig nga peke kabaylu it gina pangayung kwarta nga naga balor it 350 pesos.
Sa gin patigayun nga operasyon, nagserbe nga buyer kara ro sangka reservist it Philippine Army nga nakasayod sa proseso sa pag tao it mission order.
Gin hayag ni Lt. Col. Rommel Abayon Head it 601st it Philippine Army sa Libas, Banga nga maabong mga reservists ro natigayun nga maloko it suspect.
Gin klaro kara nga owa it connection sa Philippine Army ro nasambitan nga persona kamana man nga peke tanan ro anang gina presentar nga ID kaeakip eon ro gina daeang baril kara nga nadiskubrehang plastic eamang.
Nasayuran nga maabo eon nga kaso it pagpangloko ro gin himo it suspect ku mga nagtaliwan base man sa record it Kalibo PNP Station.
Sa makaron hay naga panawagan man si Abayon sa mga nabiktima it suspect nga magdihon it pormal nga reklamo kontra sa nasambitang suspect.
