Padayon sa gihapon nga nagahueag ro Aklan Police Provincial Office (APPO) para matapna ro sigidas nga pagpanakawan sa probinsya it Aklan.
Suno kay PSSgt. Jane Vega, tagapaghambae it APPO, ginakabig nga madja serye ro panakawan sa probinsya bangud haeos ku nagtaliwan nga dag-on pa nagapaytika-tika ro mga kawatan ngara ag nasundan it haeos sunod-sunod nga insidente it panakawan ro nag tuhaw sa mga nagtaliwan nga dominggo.
Gintuyo sigon it mga kapulisan nga tukibon ag sayuron ro mga identity it mga imbolbado ngara nga mga persona.
Dugang pa nana, uwa nagapundo ro andang taeatapan para ma tapna ro mga makarundayang insidente. Ro andang mga tikang kara hay i-maximize ro police presence, pag-patrol sa mga banwa, ag may integrated patrol deployment plan sanda kun sa siin may mga nakastand by nga mga kapulisan sa kada munisipyo una mismo sa mga daeanon.
Nagapangayo man sanda it mabahoe nga partisipasyon ag kooperasyon maghalin sa komunidad nga mangin kaibahan nanda sa pagkontra it rayang hitabo. Kun may nasayuran ukon nabiktima it rayang mga tikwian hay insigida nga magreport sa kapulisan para eagi nga maimbestigahan.
