KALIBO, Aklan—Dismayado nga nagreklamo sa Kalibo Police Station ro sangka 73-anyos nga Lola kaibahan ro anang pamilya matapos nga ginaalegar nga nabiktima sigon it budol-budol sa banwa it Kalibo.
Natigayon nga nabueo sa biktima ro anang bueawan nga alahas nga ginakaeakipan it aritos, relo ag singsing kamana man cash money nga nagaabot sa P46,000.
Una sigon kara, ginpaeapitan ro biktima it sangka eaeaking suspek nga nagpakilaeang bag-o eamang nga panaog sa barko ag amigo it anang onga kon siin may itao sigon kana nga pahumot.
Bangud kara, gilayon nga nagsunod ro lola sa suspek ag ginpasakay imaw sa anang saeakyan kon siin idto ro daywang ka mga babaye nga nakipag-istorya kana hasta nga naabot sa punto nga ginpahukas kana ro anang mga alahas ag ginbutang sa pouch nga idto man nakasueod ro anang kwarta.
May kaangtanan kara, ginbayluhan sigon imaw it pouch nga ginasugid nga may sueod nga kapin sa P300,000 nga kwarta apang kat ginbuksan raya it anang pamilya hay naka-rolyo nga papel ro sueod ag iba.
Ro insidente hay nagtuga it kapyerdihan sa tagreklamo kon siin ginpakamayad eon lang nga i-report sa taeatapan it pulisya para sa nagakaigong imbestigasyon.
