KALIBO, Aklan — Patay eon kat maka-abot sa Aklan Provincial Hospital ro sangka 85-anyos nga lola nga ginapatihan nga nadanlog ag nahueog sa suba nga naging rason it anang pagka-eumos samtang nagahana kunta nga magahugas it pinggan sa Brgy. Dumga, Makato, bandang alas-6 it gabi-i it Huwebes, Disyembre 5, 2024.
Suno kay P/Lt. Arnold Tejada, deputy chief of police it Makato Municipal Police Station nga base sa imbestigasyon, nag-agto sa suba ro magueang kaibahan ro anang 13 anyos nga apo nga may special needs nga may bitbit nga pinggan kat aksidenteng madanlog sa kabatuhan ag nahueog sa suba .
Nagpaninggitan ag nagpangayo sigon it tabang ro apo nga insigida man nga ginkabuligan it mga igbata nga mahaw-as sa tubi ro magueang ag gindaea sa andang baeay.
Sa pag-abot it mga responders it MDRRMO-Makato , nakita nga naka-eubog eon sa katre ro biktima ag owa eon it senyales it kabuhi.
Gindaea nanda raya sa ospital apang gindeklara it nagtatap nga doktor nga binawian eon it hueam nga kinabuhi ro lola.
