KALIBO, AKLAN — Suspendido ro siyam nga empleyado it Department of Environment and Natural Resources (DENR)-Aklan bangud sa ginaalegar nga eakot ro mga raya sa iligal nga pagpatitulo it eogta sa isla it Boracay.
Pirmado ni dating DENR secretary Gina Lopez ro desisyon sa kasong gindihon kontra sa nasambitang mga empleyado nga responsabli sa pag-isyu it 18 homestead patents sa pilang ektaryang public land sa isla.
Ginkilaea ro mga empleyado nga sanday Antonio Luis, dating Officer-in-Charge it provincial environment and natural resources officer (PENRO), Merlyn Aborka, dating Officer-in-Charge it Community Environment and Natural Resources Office (CENRO)-Boracay nga sa makaron hay Technical Division Chief it DENR-Aklan ag si dating CENRO Boracay Engr. 1V Emmanuel Tigpos.
Sanday Luis , Aborka ag Tigpos hay gintaw-an it an-om nga bueang suspension ag disqualification for promotion.
Samtang, dismissal man ro ginpapanaog nga desisyun kanday dating Land Management Specialist Pedy De Pedro ag dating CENRO Boracay Deputy Public Land Inspector Alvaro Nonan.
Sa pihak nga parte, tatlong bueang suspension ro ginta-o kanday Engr. Romulo Sumaculub, Chief Surveys Division, Althea Acevedo, Chief Technical Services Section ag Engr. Mamerto Caballero, Chief Regional Surveys Division.
Nabasura man ro kasong gross neglect of duty ni dating CENRO Boracay Land Management Specialist Filomena Socion.
Sa interview it Bombo Radyo, emosyunal nga ginpahayag it mga imbolbadong empleyado nga inde nanda mabaton ro ginpapanaog nga desisyon bangud uwa sigon sanda it kasae-anan.
