Siyam nga sako it ginadudahan nga bawae nga droga ro nadakpan it Philippine Coast Guard (PCG) sa baybayon it Barangay Sisiman, Mariveles, Bataan, Hunyo 2, 2025.
Sa idaeum it direktiba ni Pangueong Ferdinand R. Marcos Jr. nga pabaskugon pa it PCG ro andang mga programa sa pakikipag-angot ag pagtau it kasayuran sa mga baybayong komunidad, insigidang nag-report ro sangka lokal nga mangingisda sa Coast Guard Station (CGS) Bataan angot sa insidente.
Ginsaysay it nakakita nga mangingisda nga ko petsa 29 it Mayo 2025, samtang nagapangisda sa kaeawran nga sakop it Zambales hay nakit-an nana ro siyam nga sako nga may sueod it ginadudahan nga droga.
Temporaryo nana nga gintago ro mga kontrabando sa sangka nakadungka nga barge sa Mariveles, Bataan ag dayun nga gin-report sa mga awtoridad.
Insigidang ginpadaea sa lugar ro sangka gintingob nga inspection team nga ginaeakipan it CGS Bataan Quick Response Team, PCG K9 Unit Bataan, ag mga tawuhan it PCG Intelligence.
Sa ginpatigayon nga inspeksyon, positibong gintumod it mga K9 unit it Coast Guard ro presensya it ilegal nga droga.
Insigida man nga nakipag-angot ro CGS Bataan sa Philippine Drug Enforcement Agency (PDEA)-Bataan, nga nagpatigayon it on-site assessment ag nagkumpirma nga ro mga nakumpiskang gamit hay ginadudahan nga ginabawae nga droga.
Nakakordon man sa lugar ro mga tawuhan it CGS Bataan agud nga magbulig sa dokumentasyon, seguridad, ag proseso it turnover.
