KALIBO, Aklan – – – Gin tawag nga “heartless” ni Siegfred Deduro, Vice President for Visayas of the Makabayan Coalition ro nangin desisyon ni Pangueong Rodrigo Duterte nga total closure sa isla it Boracay sa sueod it an-um nga buean.
Suno kay Deduro, makabig nga “shedding crocodile tears” ro pangueo nga naga pakuno-kuno nga may kabaeaka sa environmental issue sa isla apang, ro kamatuoran hay may kaugalingon rayang agenda.
Partikular nga gina tumod kara ro pagsueod it Macau based casino resort sa Boracay nga matsa nagagowa nga gin baligya it presidente ro isla sa mga Instik.
Samtang, owa man naga pabor si Deduro sa total closue sa Boracay bangud sa pwede man sigon raya nga ipatigayun “by phase.”
Suno pa kana nga naging ura-urada ro desisyon it pangueo bangud sa owa kara gin isipa ro mga sektor nga eubus nga maapektuhan kara.
Gin pahayag dugang pa ni Deduro nga owa eon konta naglala ro problema sa Boracay engkaso nga ku una pa eamang hay gin taw-an eon it igtaeupangud ro mga suhestiyon it environmentalists nga makaangkon it benchmark para sa holding capacity it isla agud mapabilin ro sustainable ecology it lugar.
