KALIBO, Aklan — Uman nga ginpaiway kahapon nga adlaw ro pagtalakay it investigating committee nga gintukod ni Governor Florencio Miraflores agud nga imbestigahan ro security lapses it Aklan Rehabilitation Center (ARC) sa Brgy. Nalook, Kalibo.
Raya hay suno kay Aklan first district board member Nemesio Neron matapos nga uwa pa nakabueo it abogado ro respondent.
Suno kana, may demokrasya ro nasyon rason nga andang ginpaboran ro hinyo it respondent partikular ro jail guard nga kaibahan it inmate nga si Jose Tropa kat imaw hay nakapaeagyo halin sa pag-tambong it hearing sa Manila.
Madumduman nga unang gintaeana ro pag-convene it komitiba ko Oktobre 5 apang nadiskubrehan nga uwa it notaryo ro affidavit of statements it respondents nga ginpresentar ni jail warden Pedrito Escarilla sa plenaryo rason nga gindesisyunan it komitiba nga i-reschedule ro imbestigasyon kahapon nga adlaw, Nobyembre 12.
Apang, uman raya nga napaiway bangud nga uwa pa nakakita it abogado ro nasambitang jail guard.
May kaangtanan kara, uman nga gintaeana ro imbestigasyon it komitiba sa Nobyembre 20, 2019.
Nasayuran nga ro investigating committee hay ginabilog nanday Atty. Shelwyn Ibarreta kaeakip ro mga miyembro nga sanday Medelia Solanoy; Methuselah Sta. Maria; Atty. Lorielle Rovero ag si board member Neron mismo.
