KALIBO, Aklan–Samtang ginahueat pa ro pag-abot it AstraZeneca vaccines sa banwa it Kalibo, nagpatigayon it transportation and security simulation drill ro lokal nga gobyerno agud nga masigurado ro kahauman antes ro aktwal nga pag-abot kara.
Suno kay Municipal Treasurer ag Vaccine Czar Rey Vllaruel ro simulation hay nag-umpisa sa pag-pick-up it bakuna halin sa Kalibo International Airport hasta sa pag-transport kara paagto sa birthing facility it munisipyo nga gintaeana nga cold chain storage para sa mga bakuna sa N. Roldan St Kalibo.
Makarondaya man sigon ro mga pamaagi nga obrahon engkaso nga kon ro bakuna hay igapaagi sa siyudad it Iloilo.
Paga-estudyuhan sigon sa simex ro travel time, daeagan it trapiko ag numero it mga saeakyan nga maga-convoy kaibahan eon ro saeakyan it kapulisan.
Ginpahayag pa ni Villaruel nga kaibahan ro LGU-Kalibo sa second batch it kapin sa 1.7 milyon doses it AstraZeneca vaccines nga maga-abot sa Pilipinas nga ginaeauman sa unang quarter it makaron nga dag-on.
Suno kana nga sambilog ro munisipyo sa haeos 80 nga mga LGUs sa nasyon nga unang nakipag-negotiate agud nga makabakae it andang kaugalingon nga COVID 19 vaccines.
Sa oras nga maga-abot ro mga bakuna hay makaangkon it tripartite agreement sa tunga it LGU-kalibo, national government ag Department of Health nga imaw ro magatau it mga heringgilya ag iba pang kagamitan para sa pag-arangkada it inoculation ukon mass vaccination.
Nagpa-reserve suno kana ro Kalibo it 16,400 doses it AstraZeneca vaccines nga tama para sa 8,200 nga kalibonhon nga nagabalor it kapin sa 8 milyon pesos.
Bastante suno kana ro andang pondo nga may initial allocation nga 10 milyon pesos.
