KALIBO, Aklan–Ginpaeawig pa it lokal nga gobyerno it Aklan ro vaccination rollout para sa mga healthcare workers.
Nasayuran nga nag-umpisa ro “Resbakuna, Kasangga ng BIDA” Covid-19 vaccination ko Miyerkules, Marso 10 ag magatapos kunta ko Biyernes, marso 12 apang bangud nga may mga nabilin pang bakuna rason nga nakaangkon it extension it hasta makaron nga adlaw it Sabado.
Base sa pinaka-ulihing record it Provincial Health Office ukon PHO-Aklan, ko Marso 12, nag-abot eon sa 1,228 nga healthcare workers ro nabakunahan gamit ro Sinovac vaccine.
Nauna eon nga ginpahayag ni Dr. Lesley Ann Luces it PHO-Aklan nga pila sa mga naturukan it bakuna hay nakabatyag it side effects kapareho it pagsakit ag pagkatoe it parte it butkon nga ginbakunahan samtang ro iba hay nakaexperiensiya it pagtaas it presyon it dugo, apang matapos nga makapahuway hay nagbalik man sa normal ro andang BP
Pila sa mga naka-schedule nga ginbakunahan makaron nga adlaw it sabado hay ro mga empleyado it municipal health office.
Kinahangean sigon nga maubos ro gin-alokar nga 2,420 doses it bakuna para sa Aklan kun sa siin ro mga empty bottles ag mga hagamit eon nga heringgilya hay kinahangean nga maibalik sa taeatapan it department of health regional office 6.
Makataliwan ro 28 diyas hay uman nga pagaturukan it ikaywang dose it bakuna ro mga healthcare workers it aklan provincial hospital ag iba pang mga pampubliko ag pribadong ospital sa probinsiya para sa eubusan nga proteksyon kontra sa makamaeatay nga sakit.
