KALIBO, Aklan–Mabahoe ro pagpasaeamat it Catholic Bishops’ Conference of the Philippines ukon CBCP nga si Pope Francis mismo ro magapanguna sa selebrasyon it mga Filipino sa quincentennial celebration ukon ika-500 anyos it Kristiyanismo sa Pilipinas.
Suno kay Reverend Fr. Tudd Belandres it St. John The Baptist Carthedral nga ro Santo Papa mismo ro magapanguna sa sangka sagradong misa nga ginaeauman nga pagatambungan it Filipino community sa Italy.
Raya hay nagapakita suno kana it annag pagiging maeapit sa mga Filipino nga may mabaskog nga pagtuo sa Diyos.
May posibilidad man sigon nga uman nga makabisita ro santo papa sa pilipinas makaron nga dag-on.
Nasayuran nga ro 2015 sa kasagsagan it bagyo hay owa kara ginkansela ro anang pagbisita sa nasyon partikular sa Leyte.
Ro misa hay pagahiwaton sa St. Peter’s Basilica bandang alas 10:00 it agahon sa Italya ukon alas- 5:00 it hapon oras sa Pilipinas sa Marso 14 domingo nga adlaw.
Makaibahan sa pagpatigayon it misa sanday Cardinal Luis Antonio Tagle, ro prefect it Congregation for the Evangelization of Peoples; ag Cardinal Angelo De Donatis, ro pope’s vicar para sa Rome.
Bangud sa ginapatuman nga COVID-19 restrictions, limitadong tawo eamang ro pagapasugtan nga magtambong sa misa.
Ro selebrasyon it sagradong misa hay naka-livestream agud nga matan-aw it mga Pinoy sa nagkaeain-eain nga parte it kalibutan.
Pagahimuon raya sa lenggwaheng Italyano apang may pilang kantang pinoy ro pagagamiton sa misa.
Ginpahayag ni Fr Tudd nga mabahoe ro dapat nga ipasaeamat sa Diyos bangud sa regalo nga Christian faith ukon pagtuo.
Samtang, gindugang pa ni Fr. Tudd nga sa Abril 4, Easter Sunday hay igalunsarman it Diocese of kalibo ro yearlong commemoration.
Sigidas suno kana ro andang pagpahaum eabi eon ro pag-ayos sa main door it simbahan nga magiging holy door agud nga ro magasueod hay mataw-an it bilog nga bendisyon.
