KALIBO, Aklan–Pursigido ro sangka eaeaki nga makobra ro anang nadag-an nga 14,000 pesos sa peryahan ng bayan.
Raya hay matapos nga gina-alegar nga ginpamalibaran it babayeng agent nga gintay-an nana ro numerong 02-22 nga imaw ro kumbinasyon it numero nga nagdaog sa andang draw ko martes nga adlaw, Marso 16.
Suno sa eaeaki nga nagpamalibad nga magpamitlang it pangaean nga nagtaya imaw ko nasambit nga adlaw sa cockpit arena it banwa it Balete gamit ro waeong nagkaeain-eain nga kumbinasyon it numero nga naga-abot tanan sa 300 pesos.
Sa anang ginabuytan nga resebo hay nagdaog ro anang numero.
Gina-insister sigon it agent nga ginbag-o it eaeaki ro anang gintay-an nga numero nga imbes nga 02-22 hay 20-12.
Nasayuran nga sa listahan it agent hay 20-12 ro nakalista, apang sa gin-isyu nga resebo hay 02-22 rason nga ginapamilit it eaeaki ro anang kinamatarung sa pagdaog sa nasambit nga peryahan ng bayan.
Sa pihak nga parte, ro ginareklamo pa it eaeaki nga imbes nga magpangayo kana it pasaylo ro agent sa palpak nga trabaho hay naging arogante pa raya.
