KALIBO, Aklan — Nakalista it limang patay sa sueod eamang it sang adlaw bangud sa COVID-19 ro probinsiya it Aklan.
Bangud kara, naga-abot eon sa 62 ro namatay sa probinsya bangud sa deadly virus.
Suno kay Dr. Cornelio Cuatchon it Provincial Health Office, sunud-sunod ro pagkamatay it mga pasyente kahapon, Hunyo 4, nga ginaeakipan it 84-anyos nga babaye halin sa Banga. Binawian raya it hueam nga kabuhi bandang alas-12:49. Bandang alas-3:34 it hapon hay namatay man ro 75 anyos nga eaeaki nga residente it banwa it Numancia; ginsundan raya it 50-anyos nga taga-Ibajay bandang alas-3:52 ag sangka 45-anyos nga eaeaki ag ro pinaka-ulihi hay sangka 57-anyos nga taga-Kalibo bandang alas-10:52 it gabi-i.
Presenteng nagapatigayon it contact tracing ro mga awtoridad sa mga tawong nakasalamuha it nasambit nga mga pasyente.
Samtang, as of June 4, 344 ro active cases it COVID-19 sa probinsya it Aklan, kaibahan kara ro 48 nga bag-ong nadugang.
Padayun man nga nagapadumdum ro mga awtoridad nga ipabilin ro pagsunod sa mga health protocols kapareho it pagsuksok it face mask ag face shield, paghugas it alima ag social distancing.
