KALIBO, Aklan — Pormal eon nga nagdeklara it kandidatura sa 2022 elections si dating Sangguniang Bayan member Jessica Panambo para sa pagiging alkalde it New Washington.
Magaserbing running mate ni Panambo si dating Vice Mayor Molot Quimpo nga uman nga magapailihir bilang bise alkalde.
Ginpamilit ni Panambo nga magiging sentro it andang programa ni Quimpo ro pagtinguha nga maibalik ro progreso it banwa nga makaron suno kana hay masyado eon nga naaywan ag napabay-an.
Ginaeauman nga hugut kara nga maka engkwentru sa maabot nga eleksyon si incumbent Mayor Shimonette Peralta-Francisco.
Ginpahayag pa ni Panambo nga matapos ro anang termino sa pagka-konsehal ko 2010 hasta 2013 hay nagbalik imaw sa anang pribadong kabuhi ag nagdesisyon nga magtutuk sa anang negosyo sa Manila.
Apang ko ulihi hay makapilang beses imaw nga gin istorya it Tibyog-Akean pinaagi kanday Governor Florencio Miraflores ag 2nd district Congressman Ted Haresco nga uman nga sumabak sa pulitika.
Mag-eowas kara may pilang kaalyado ag mga pumueuyu man ro nag-kumbinyo kana nga pamunuan ro banwa rason nga nakahimo imaw makaron it anang pinal nga desisyon .
Sa pihak nga parte, ginpabugae pa nana nga magiging powerhouse ro anang linyada it mga Sangguniang Bayan members nga ginaeakipan nanday incumbent SB member Rolly Equiña, dating SB member Hasel Bautista, dating Guinbaliwan punong barangay Vicente Quimpo, Tambak barangay kagawad Job Stan Retamar, Poblacion barangay kagawad nga sanday John Repedro ag Jun Crisostomo, kamana man sanday Engr. Che Alfaro ag Allan Bernardino.
