KALIBO, Aklan—Ginpaathag ni Tangalan Mayor Gary Fuentes nga fully recovered eon ro andang pinaka-unang kaso it Delta variant it COVID-19.
Suno sa alkalde ro pasyente hay sangka 24-anyos nga healthcare worker sa sangka pribadong ospital sa banwa it Kalibo.
Ginpaidaeom sigon raya sa RT-PCR test ko Hulyo 28 ag dikara natukiban nga positibo imaw sa deadly virus.
Insigida sigon nga nagpatigayon it maidid nga contact tracing ro lokal nga gobyerno kun siin nakalista sanda it pitong ka mga high risk contact it pasyente.
Sa nasambit nga numero, tatlo ro nagpositibo samtang negatibo man sa virus ro ap-at.
Bangud kara, uman sandang nagpatigayun it contact tracing sa second generation.
Halin sa an-om nga high risk contact, sambilog ro nagpositibo ag lima ro negatibo sa COVID-19 infection.
Ginapahayag nga gindeklara eon nga recovered ro nasambit nga healthcare worker matapos ro 14 diyas nga isolation.
Bilang pagsunod sigon sa polisiya it ospital nga anang ginatrabahuhan, uman raya nga nagpaidaeom sa swab test antes magbalik sa trabaho kun siin nagguwa nga negatibo eon imaw sa deadly virus.
Aminado man si Mayor Fuentes nga nakabatyag sanda it kahadlok ag pagkabaeaka matapos nga mabaton ro resulta halin sa Provincial Health Office kasunod it ginpatigayun nga genome sequencing sa mga swab sample nga ginpadaea sa Philippine Genome Center.
Madumduman nga nakalista ro probinsya it 21 nga kaso it Delta variant kun siin 20 sa mga raya ro eubusan eon nga nagmayad samtang sambilog ro namatay.
Sa makaron, nagapabilin sa idaeom it Modified Enhanced Community Quarantine (MECQ) ro Aklan hasta katapusan it Agosto sandig sa naging pueong it Provincial Inter-Agency Task Force.
