KALIBO, Aklan—Nagapabilin sa committee level ro aplikasyon ni Mr. Antonio Maming, presidente it Green Dragon Incorporated angot sa anang hinyo nga makasikyar it nagakaigong dokumento nga ginakaeakipan it letter of no objection ukon LONO ag council resolution ukon ordinance agud nga makabueo it lisensya sa PAGCOR ukon Philippine Amusement and Gaming Corporation para maka-operate it poker games ukon e-binggo.
Suno kay Kalibo SB secretary Diana Fegarido, Nobyembre 8, 2022 pa ro naging request ni Maming apang sa evaluation nga ginhimo it komitiba hay nakitaan raya it discripancy eabi eon sa ginatumod nga lugar nga pagabutangan it nasambit nga e-binggo.
Angot kara, insigida sigon imaw nga ginpasayod agud nga maayos ro dokumento apang hasta sa makaron hay uwa eon nakabalik si Maming sa andang taeatapan.
Ginpahayag dugang ni Figarido nga mag-eowas kay Maming hay uwa eon it iba pang indibidwal nga nagsumite it aplikasyon sa taeatapan it lokal nga gobyerno it Kalibo.
