KALIBO, Aklan—Sangka patay nga pawikan nga ginatantiya nga 30 kilos ro bug-at ro nakit-an sa baybayon nga sakop it Brgy. Pook, Kalibo.
Suno kay punong barangay Lodi Pinos it nasambit nga lugar nga ro pawikan hay nakita it sambilog sa anang barangay tanod samtang nagapamunit.
Ginasugid nga nakita raya nga naga-eutaw-eutaw sa eawod nga una eon sa state of decomposition bangud sa mabaho nga hugum.
Gintinguhaan sigon nana raya nga guyuron sa bibi it baybay, apang naging mabudlay bangud nga de-bogsay nga baroto ro anang daea.
Ginbalikan nana raya gamit ro de-motor nga baroto apang owa eon nanda raya naabutan matapos nga gin-anud sa ibang lugar.
Indi pa nanda matumod ro posibleng rason it pagkamatay kara.
Ginpahayag ni kapitan Pinos nga sa makaron hay ginmandu nana ro pag-usoy sa pawikan eabi eon sa mga coastal areas it anang nasakupan agud nga mapaabot sa natungdan nga ahensiya it gobyerno kamana man nga mai-eubong it maayos ro pawikan.
